ജലാലുദ്ദീന്‍ റൂമിയുടെ തിരഞ്ഞെടുക്കപ്പെട്ട പാനകള്‍
നിന്‍ ഉയിരിന്‍ നീരതെന്നെ മത്തു പിടിപ്പിച്ചു
ചാവ് വന്നെന്നെ മണത്തപ്പോള്‍ അറിഞ്ഞത് നിന്‍ മണം
അന്നു മുതല്‍ക്ക് ചാവെന്നെ കൈവെടിഞ്ഞു
* * *
ഒരു നാള്‍ തിരിഞ്ഞു നോക്കി നീ ചിരിക്കും
നീ പറയും, "ഞാന്‍ ഉറക്കമായിരുന്നോ?
ഞാന്‍ ഉണ്മ മറന്നതെങ്ങിനെ?
അഴലും വയ്യായ്കയും ഇരുട്ടുമെല്ലാം
പേടിക്കനവുകള്‍ മുറ്റുമല്ലയോ!"
* * *
കിളിപ്പാട്ടെന്‍ കാതില്‍ ഇമ്പമാകുന്നു
കിളികളെ പോലെ പാടാന്‍ കൊതിക്കുമെന്‍ തൊണ്ടയില്‍ ഒലിയില്ല
പടച്ചവനേ, എന്നിലൂടെ നീയും പാടില്ലേ?
* * *
ഈ പൂന്തോട്ടത്തിന്‍ തിളക്കം നിന്‍ മേനിയോ,
ഈ പൂന്തോട്ടത്തിലെ പൂക്കള്‍ നിന്‍ നറുമണമോ,
വീഞ്ഞിന്‍റെ പുഴയൊഴുക്കുന്നത് നിന്‍ ഉള്‍ത്തുടിപ്പോ?
ആയിരങ്ങള്‍ നിന്നെ തിരഞ്ഞു വഴിപിഴച്ചു,
എന്നെന്നേക്കുമായവര്‍ കാണാതായി, നീ ഒളിക്കുന്നയീ പൂന്തോട്ടത്തില്‍
ഉറ്റവരോടൊപ്പം വരുന്നവര്‍ക്കീ നോവില്ല
അവര്‍ക്ക് നിന്നെ കണ്ടെത്തുവാനെളുപ്പം
തെന്നലില്‍ നീ തെന്നിപ്പായുന്നു
വീഞ്ഞിന്‍റെ പുഴയില്‍ നീ ഒഴുകിക്കളിക്കുന്നു
* * *
അടിക്കുറിപ്പ്:
ഇമ്പര്‍ = Humans/mortals, ചാവ് =Death, അഴല്‍ = Sadness, വയ്യായ്ക = Sickness, പേടിക്കനവ് = Nightmare
_face_%C3%A0_Taron_Voskanyan_(Arm).jpg)
